Siol nan Gaidheal forum

I thocht noo thit we've got wursels a guy weel-deservit houf in whaur tae vent wur fashin anent wur ither leid, it wis aboot time i introduced yaes tae the scrievin o ma faither. i growit up wi' the Scots through his intrest in it, sae here are wan or twa wee dods o verse....


Tae His Back-haudin' Quine
(wi' a sleekit salute tae Andra Marvel)

There's nae need tae fret lass
Nae need fur regret
Ye'll suffer nae hurt frae me
Gin ye gie yersel' lass
Gin ye gie yersel' tae me

A'm certin shair lass, certin shair
It'll sever the ties wi' the past
It'll let ye stairt yer life anew
Mak up fir the wastit time ye rue
An' set ye free at last

Tho A lo' ye dear lass, A lo' ye dear
But a fear this fear
That comes atween us noo
Fur gin we pairt ma sunnert hairt
'll no be bigged anew

So dinna haud back lass
Dinna haud back
Fur time gaes hirplin' oan
An' gin we wait tae git bette aquaint
Aiblins life itsel'll be gone


Schoolhoose On Mull

Forsaken oan the muir
Perched high
Whaur wind an' rain beat doon
Wi' frenzied fists

Nae feat tae let imagination loose
An' conjure-up a tale

Mist, nae vanquished wi' the mornin' sun
Grass greener fur the crystal dew
Burns, nae stilled by nicht's lang spell
But chatterin' yit
Chinwaggin' wi' the ferns

Comes creepin' oan the wind
An urgent clamour
A knell tae laggin' step
By fleetin ' troot or plaintive gull beguiled

Nae need fur sicht tae see
Grim dominie
In portals framed
Goon flappin' flexin' tawse
Eager tae punish tardy youth

A' gone
Youth
Dominie alike
The bell lang stilled

Nocht but crumblin' stanes remain


Sair Heid

Ma heid's a whirlygig
A hale clamjamfrey
O' ideas an' notions

The idea that the wurld
C'd be a sicht happier place fur aw
An' the notion
That the only proper wurk fur man
Is bringin' this aboot

The idea that lethargy an' apathy
Ur social diseases
An' the notion
That the cure lies in a' men actin;
Wi' effect an' energy

The idea that complacency
Is e'en a worse affliction
An' the notion
That its maist prevalent amang them
As ought tae ken better

The idea that retirement
Is a cairry-ower frae a by-gone age
An' the notion
That life sh'd be sic a celebration
That nae man wid want tae opt oot

The idea that war
Is a futile obscenity
An' the notion
That peace is no juist ther fur the askin'
It has tae be wurked fur, an' constantly

The idea that liberty
Is nae the same as license
An' the notion
That gie'n up some pers'nal autonomy
Is pairt o' the price o' freedom

The idea that ignorance an' greed
Were the dynamics o' the industrial rev'lution
An' the notion
That we've brocht them richt intae the space age
An' made a scrapyaird o the firmament

The idea that man though inf'nitely foolish
Has limitless potential fur guid
An' the notion
That he could and should
Act afore it's too late

Ach! ma heid's a whirlygig
A hale clamjamfrey o' ideas an' notions


Jimmy Byrne

Ha brilliant, this is your old man?

I don't undestand most of it but i'll pick it up.

Aye, this is the lod richt eneuch. He disny ken how tae spik the leid, but he scrieves in it weel eneuch....

i didnae ken ye wer a fifer adhamh

_________________
nows the day nows the hour

ha, the ane thing that's Fife-lik aboot me's the bananas in ma scullery!